ଆର୍ଜେଣ୍ଟିନାକୁ ହରାଇ ଚାମ୍ପିଅନ ସାଜିଲା ସ୍ପେନ୍

୧୬ ବର୍ଷ ଅପେକ୍ଷାର ହେଲା ଅନ୍ତ। ଫିଫା ବିଶ୍ୱକପ ୨୦୨୬ର ଚାମ୍ପିଅନ ସାଜିଲା ସ୍ପେନ୍। ୨୦୨୬ ଫିଫା ବିଶ୍ୱକପ୍ ଫାଇନାଲରେ ଆର୍ଜେଣ୍ଟିନାକୁ ୧-୦ ଗୋଲରେ ପରାସ୍ତ କରି ସ୍ପେନ୍ ଦ୍ୱିତୀୟ ଥର ପାଇଁ ବିଶ୍ୱକପ୍ ଟ୍ରଫି ହାସଲ କରିଛି। ଜୁଲାଇ ୧୯, ରବିବାର ଆମେରିକାର ନ୍ୟୁ ଜର୍ସିରେ ଅନୁଷ୍ଠିତ ଏହି ରୋମାଞ୍ଚକର ଫାଇନାଲ ମ୍ୟାଚରେ ନିର୍ଦ୍ଧାରିତ ୯୦ ମିନିଟ୍ ପର୍ଯ୍ୟନ୍ତ ଉଭୟ ଦଳ ଗୋଲ୍ ଶୂନ୍ୟ ରହିଥିଲେ। ଫଳରେ ମ୍ୟାଚ୍ ଅତିରିକ୍ତ ସମୟକୁ ଗଡ଼ିଥିଲା। ତେବେ ଅତିରିକ୍ତ ସମୟର ଦ୍ୱିତୀୟାର୍ଦ୍ଧରେ ସ୍ପେନ୍ ଖେଳାଳି ଫେରାନ୍ ଟୋରେସ୍ ମ୍ୟାଚ୍‌ର ଏକମାତ୍ର ଗୋଲ୍ ସ୍କୋର କରି ସ୍ପେନ୍‌କୁ ଐତିହାସିକ ବିଜୟ ଦେଇଥିଲେ। ଏହି ବିଜୟ ସହିତ ୨୦୧୦ ପରେ ସ୍ପେନ୍ ପୁଣିଥରେ ବିଶ୍ୱ ଫୁଟବଲର ସର୍ବୋଚ୍ଚ ସମ୍ମାନ ହାସଲ କରିଛି।

ଖେଳାଯାଇଥିବା ଫାଇନାଲ୍‌ରେ ୧୦୬ତମ ମିନିଟ୍‌ରେ ଫେରାନ୍ ଟୋରେସ୍‌ଙ୍କ ଚମତ୍କାର ଗୋଲ୍ ସହ ମ୍ୟାଚ୍‌ର ମୋଡ଼ ସମ୍ପୂର୍ଣ୍ଣ ବଦଳିଯାଇଥିଲା। ତାଙ୍କର ଦମଦାର ଫିନିସିଂ ଷ୍ଟାଡିୟମ୍‌ରେ ଉପସ୍ଥିତ ଦର୍ଶକଙ୍କୁ ସ୍ତବ୍ଧ କରିଦେଇଥିଲା। ଏହି ଗୋଲ୍ ପରେ ଆର୍ଜେଣ୍ଟିନାର ପ୍ରତ୍ୟାବର୍ତ୍ତନର ଆଶା ପ୍ରାୟ କ୍ଷୀଣ ହୋଇଯାଇଥିଲା। ଶେଷ ପର୍ଯ୍ୟାୟରେ ଆର୍ଜେଣ୍ଟିନାର ଏଞ୍ଜୋ ଫର୍ଣ୍ଣାଣ୍ଡେଜ୍ ରେଡ୍ କାର୍ଡ ପାଇବା ପରେ ଦଳକୁ ୧୦ ଜଣ ଖେଳାଳିଙ୍କ ସହ ମ୍ୟାଚ୍ ଶେଷ କରିବାକୁ ପଡ଼ିଥିଲା। ସେହିପରି ଡିଫେଣ୍ଡର ଲିସାନ୍ଦ୍ରୋ ମାର୍ଟିନେଜ୍ ଆହତ ହୋଇ ପଡ଼ିଆ ଛାଡ଼ିବା ଦଳ ପାଇଁ ଆଉ ଏକ ବଡ଼ ଝଟକା ସାବ୍ୟସ୍ତ ହୋଇଥିଲା।

ସ୍ପେନ୍‌ର ୧୯ ବର୍ଷୀୟ ଯୁବ ସେନ୍ସେସନ୍ ଲାମିନ୍ ୟାମାଲ ପୂରା ୧୨୦ ମିନିଟ୍ ଧରି ଆର୍ଜେଣ୍ଟିନାର ରକ୍ଷଣଭାଗକୁ ନିରନ୍ତର ଚାପରେ ରଖିଥିଲେ। କୋଚ୍ ଲୁଇସ୍ ଡି ଲା ଫୁଏଣ୍ଟେଙ୍କ ସୁଚିନ୍ତିତ ରଣନୀତି, ଶୃଙ୍ଖଳିତ ଡିଫେନ୍ସ ଏବଂ ଆକ୍ରମଣାତ୍ମକ ଖେଳର ବଳରେ ସ୍ପେନ୍ ଏକ ସ୍ମରଣୀୟ ବିଜୟ ହାସଲ କରି ନିଜ ଅଭିଯାନକୁ ସଫଳତାର ଶିଖରରେ ପହଞ୍ଚାଇଛି। ଏହି ଟୁର୍ଣ୍ଣାମେଣ୍ଟରେ ସ୍ପେନର ପ୍ରଦର୍ଶନ ଅତ୍ୟନ୍ତ ଚମତ୍କାର ଥିଲା । ପୂରା ବିଶ୍ୱକପରେ ଦଳ ମାତ୍ର ଗୋଟିଏ ଗୋଲ ଖାଇଥିଲା, ଯାହା ଏକ ରେକର୍ଡ କରିଛି।

ଅନ୍ୟପକ୍ଷରେ, ଲିଓନେଲ୍ ମେସିଙ୍କ ନେତୃତ୍ୱରେ ଆର୍ଜେଣ୍ଟିନା ଶେଷ ପର୍ଯ୍ୟନ୍ତ ଲଢ଼େଇ କରିଥିଲେ ମଧ୍ୟ ସ୍ପେନ୍‌ର ଦୃଢ଼ ପ୍ରତିରକ୍ଷାକୁ ଭେଦ କରିପାରିନଥିଲା। ଫଳରେ ୨୦୨୨ ବିଶ୍ୱକପ୍ ଚାମ୍ପିଅନ୍ ଆର୍ଜେଣ୍ଟିନାର ଚତୁର୍ଥ ଥର ବିଶ୍ୱକପ୍ ଜିତିବାର ଆଶା ଧୂଳିସାତ୍ ହୋଇଯାଇଥିଲା। ଅନ୍ୟପଟେ, ୧୬ ବର୍ଷ ଅର୍ଥାତ୍ ୨୦୧୦ ପରେ ଦ୍ୱିତୀୟ ଥର ପାଇଁ ଫିଫା ବିଶ୍ୱକପ୍ ଜିତି ବିଶ୍ବ ବିଜୟୀ ହୋଇଛି ସ୍ପେନ୍।