ବେଲୁନ୍ ବିକାଳି ନାବାଳିକା ଦୁଷ୍କର୍ମ ଓ ହତ୍ୟା ଘଟଣା: ପୋଲିସର ଏନକାଉଣ୍ଟରରେ ଅଭିଯୁକ୍ତ ଆହତ।

ଦିଲ୍ଲୀର ମେହରାଉଲି ଅଞ୍ଚଳରେ ଫୁଟପାଥରେ ଶୋଇଥିବା ୧୦ ବର୍ଷର ନାବାଳିକାକୁ ଅପହରଣ, ଦୁଷ୍କର୍ମ ପରେ ହତ୍ୟା କରିଥିବା ଅଭିଯୁକ୍ତ କ୍ୟାବ୍ ଡ୍ରାଇଭରକୁ ଏନକାଉଣ୍ଟର କରିଛି ପୋଲିସ। ଅଭିଯୁକ୍ତ ପୋଲିସ ହେପାଜତରୁ ଖସି ଯିବାକୁ ଉଦ୍ୟମ କରୁଥିବା ବେଳେ ଏନକାଉଣ୍ଟର କରିଥିଲା ପୋଲିସ। ପୋଲିସ ସୂଚନା ଅନୁସାରେ, ମଙ୍ଗଳବାର ସନ୍ଧ୍ୟାରେ ଦିଲ୍ଲୀ ପୋଲିସ ସିନ୍ ରିକ୍ରିଏସ ପାଇଁ ଅଭିଯୁକ୍ତ ବାବଲୁଙ୍କୁ ଘଟଣାସ୍ଥଳକୁ ନେଉଥିବା ବେଳେ ସେ ପଳାଇବାକୁ ଚେଷ୍ଟା କରିଥିଲା। ଫଳରେ ଅଭିଯୁକ୍ତକୁ ଅଟକେଇବା ପାଇଁ ପୋଲିସ ଗୁଳି ଚାଳନା କରିଥିଲା, ଗୁଳିଟି ଅଭିଯୁକ୍ତର ଗୋଡରେ ବାଜିଥିବା ବେଳେ ଆହତ ଅବସ୍ଥାରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। ସୂଚନା ଅନୁସାରେ, ୧୦ ବର୍ଷୀୟା ପୀଡ଼ିତା ଝିଅ ଜୀବିକା ପାଇଁ ବେଲୁନ ବିକ୍ରି କରୁଥିଲେ। ସୋମବାର ସକାଳେ ଦିଲ୍ଲୀର ମେହରାଉଲିର ସିଡିଆର ଚୌକ ଅଞ୍ଚଳରେ ପୀଡ଼ିତା ନାବାଳିକା ତାଙ୍କ ପରିବାର ସହ ଫୁଟପାଥରେ ଶୋଇଥିଲେ। ସକାଳ ପ୍ରାୟ ୫ଟା ସମୟରେ ମଦ୍ୟପ ଅବସ୍ଥାରେ ଥିବା ବାବଲୁ, ଯିଏ ଜଣେ ଆପ୍-ଆଧାରିତ କ୍ୟାବ୍ ଚାଳକ ଥିଲେ, ଶୋଇଥିବାବେଳେ ନାବାଳିକା ଝିଅକୁ ଉଠାଇ ଗାଡ଼ିରେ ନେଇ ପଳାଇଯାଇଥିଲେ। ତେବେ ଝିଅର ବାପା ଉଠି ଗାଡ଼ିଟିର ପଛରେ ଦୌଉଡିଥିଲେ ମଧ୍ୟ ଅଭିଯୁକ୍ତ ପଳାଇବାରେ ସଫଳ ହୋଇଥିଲେ। ପରେ ଘଟଣାକୁ ନେଇ ପରିବାର ମେହରୌଲୀ ଥାନାରେ PCR କଲ୍ ମାଧ୍ୟମରେ ନିଖୋଜ ରିପୋର୍ଟ ଦାଖଲ କରିଥିଲେ। ସିସିଟିଭି ଆଧାରରେ ଘଟଣାର ମାତ୍ର ଚାରି ଘଣ୍ଟା ମଧ୍ୟରେ ବାବଲୁଙ୍କୁ ଗିରଫ କରିଥିଲା ମେହରାଉଲି ପୋଲିସ। ଜେରା ବେଳେ ଅଭିଯୁକ୍ତ ବାବଲୁ ସ୍ୱୀକାର କରିଥିଲା ଯେ, ସେ ଝିଅଟିକୁ ପ୍ରାୟ ୨୦ କିଲୋମିଟର ଦୂରରେ ଥିବା ଏକ ନିର୍ଜନ ଜଙ୍ଗଲ ଅଞ୍ଚଳକୁ ନେଇଥିଲେ। ସେଠାରେ ଗାଡ଼ି ଭିତରେ ତାଙ୍କୁ ବାନ୍ଧି ଦୁଷ୍କର୍ମ କରିବା ସହ ଗାମୁଛାରେ ଗଳା ଚିପି ହତ୍ୟା କରିଥିଲେ। ଅଭିଯୁକ୍ତର କହିବା ଅନୁସାରେ, ପୋଲିସ ଝିଅଟିର ମୃତଦେହ ଜଙ୍ଗଲରୁ ଉଦ୍ଧାର କରି ପୋଷ୍ଟମର୍ଟମ ପାଇଁ ମୃତଦେହକୁ ପଠାଯାଇଥିବା ନେଇ ସୂଚନା ଦେଇଛି ପୋଲିସ।  ଅନ୍ୟପଟେ, ଆପ୍-ଆଧାରିତ କ୍ୟାବ୍ ଚଳାଉଥିବା ଅଭିଯୁକ୍ତ ଡ୍ରାଇଭର ବିହାରର ବାସିନ୍ଦା ବୋଲି ଜଣାପଡ଼ିଛି। ଅଭିଯୁକ୍ତ ବିରୁଦ୍ଧରେ ପୂର୍ବରୁ ମାରପିଟ ଏବଂ ମଦ୍ୟପ ଅବସ୍ଥାରେ ଟ୍ୟାକ୍ସି ଚଳାଇବା ସମ୍ବନ୍ଧୀୟ କିଛି ମାମଲା ମଧ୍ୟ ରୁଜୁ ହୋଇଥିବା ପୋଲିସ ସୂଚନା ଦେଇଛି।