Anil Ambani Sons LOC Case:ଦିଲ୍ଲୀ ହାଇକୋର୍ଟରେ ଅନିଲ ଅମ୍ବାନୀଙ୍କ ଦୁଇ ପୁଅଙ୍କ LOC ମାମଲା
ଶିଳ୍ପପତି ଅନିଲ ଅମ୍ବାନୀଙ୍କ ଦୁଇ ପୁଅଙ୍କୁ ନେଇ ଦିଲ୍ଲୀ ହାଇକୋର୍ଟରେ ଲୁକ୍ଆଉଟ୍ ସର୍କୁଲାର (LOC) ପ୍ରସଙ୍ଗ ଚର୍ଚ୍ଚାରେ। ଜଣଙ୍କୁ ଚାରି ସପ୍ତାହରେ ସୂଚନା ଦେବାକୁ ନିର୍ଦ୍ଦେଶ ମିଳିଥିବାବେଳେ, ଅନ୍ୟ ଜଣଙ୍କ ମାମଲାରେ ଆସନ୍ତା ଶୁଣାଣି ଗୁରୁତ୍ୱପୂର୍ଣ୍ଣ ହେବ।
ନୂଆଦିଲ୍ଲୀ: ଶିଳ୍ପପତି ଅନିଲ ଅମ୍ବାନୀଙ୍କ ଦୁଇ ପୁଅ ଜୟ ଅନମୋଲ ଅମ୍ବାନୀ ଓ ଜୟ ଅଂଶୁଲ ଅମ୍ବାନୀଙ୍କ ବିରୋଧରେ ଲୁକ୍ଆଉଟ୍ ସର୍କୁଲାର (LOC) ସମ୍ପର୍କିତ ମାମଲା ଦିଲ୍ଲୀ ହାଇକୋର୍ଟରେ ଚର୍ଚ୍ଚାକୁ ଆସିଛି। ଉଭୟଙ୍କ ମାମଲାରେ ହାଇକୋର୍ଟ ଭିନ୍ନ ଭିନ୍ନ ନିର୍ଦ୍ଦେଶ ଦେଇଛନ୍ତି। ଜୟ ଅନମୋଲଙ୍କ ବିରୋଧରେ ଜାରି LOC ଏବେ ବି କାର୍ଯ୍ୟକାରୀ ଅଛି କି ନାହିଁ, ତାହା ଜଣାଇବାକୁ କୁହାଯାଇଥିବାବେଳେ, ଜୟ ଅଂଶୁଲଙ୍କ ମାମଲାରେ LOC ଜାରି ହେବାର ତାରିଖ ଓ ସମ୍ପର୍କିତ ଆଦେଶର ନକଲ ଦେବାକୁ ନିର୍ଦ୍ଦେଶ ଦିଆଯାଇଛି।
ବୁଧବାର, ଅକ୍ଟୋବର ୧୪ରେ ଜୟ ଅନମୋଲ ଅମ୍ବାନୀଙ୍କ ଆବେଦନର ଶୁଣାଣି କରି ଜଷ୍ଟିସ୍ ବିମଲ କୁମାର ଯାଦବଙ୍କ ପୀଠ ତାଙ୍କ ବିରୋଧରେ ଜାରି ହୋଇଥିବା କୌଣସି LOC ଏବେ ବି ବଳବତ୍ତର ଅଛି କି ନାହିଁ, ସେନେଇ ଚାରି ସପ୍ତାହ ମଧ୍ୟରେ ତାଙ୍କୁ ଜଣାଇବାକୁ ଅଧିକାରୀଙ୍କୁ କହିଛନ୍ତି। ବ୍ୟୁରୋ ଅଫ୍ ଇମିଗ୍ରେସନ୍ ଓ CBI ପକ୍ଷରୁ ଉପସ୍ଥିତ ଆଇନଜୀବୀମାନେ ଆବଶ୍ୟକ ସୂଚନା ନିର୍ଦ୍ଦିଷ୍ଟ ସମୟସୀମା ମଧ୍ୟରେ ଦେବାକୁ ସହମତି ଜଣାଇଥିଲେ। ଏହାପରେ କୋର୍ଟ ଆବେଦନର ନିଷ୍ପତ୍ତି କରିଥିଲେ।
ଅନ୍ୟପଟେ, ଅନିଲ ଅମ୍ବାନୀଙ୍କ ଅନ୍ୟ ପୁଅ ଜୟ ଅଂଶୁଲ ଅମ୍ବାନୀଙ୍କ ମାମଲାରେ ମଧ୍ୟ ହାଇକୋର୍ଟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଅକ୍ଟୋବର ୧୩ରେ ଜଷ୍ଟିସ୍ ମିନି ପୁଷ୍କର୍ଣ୍ଣାଙ୍କ ପୀଠ ତାଙ୍କ ବିରୋଧରେ ଜାରି LOC କେବେ ଜାରି ହୋଇଥିଲା, ତାହାର ତାରିଖ ଓ ଔପଚାରିକ ଆଦେଶର କପି ଦେବାକୁ କହିଥିଲେ। ଅକ୍ଟୋବର ୫ରେ SFIO ତାଙ୍କୁ LOC ଜାରି ହୋଇଥିବା ଏବଂ ତାହା ବଳବତ୍ତର ଥିବା ସୂଚନା ଦେଇଥିଲା। କିନ୍ତୁ ଅଂଶୁଲଙ୍କ ପକ୍ଷରୁ ଏହି ସୂଚନାକୁ ଅପର୍ଯ୍ୟାପ୍ତ ଦର୍ଶାଇ LOC ସମ୍ପର୍କରେ ଅଧିକ ସ୍ପଷ୍ଟ ତଥ୍ୟ ଦେବାକୁ ଦାବି କରାଯାଇଥିଲା।ଅଂଶୁଲଙ୍କ ମାମଲାର ପରବର୍ତ୍ତୀ ଶୁଣାଣି ଅକ୍ଟୋବର ୧୬ରେ ହେବ। ଦୁଇ ଭାଇଙ୍କ ଆବେଦନ ଅଲଗା ହୋଇଥିବାବେଳେ, ଉଭୟ ମାମଲାର କେନ୍ଦ୍ରରେ LOC ସମ୍ପର୍କିତ ସ୍ପଷ୍ଟ ସୂଚନା ପାଇବା ପ୍ରସଙ୍ଗ ରହିଛି।