Cooperative Society Scam : ସମିତି ଟଙ୍କାକୁ ନେଇ ବିବାଦ

ସମିତି ଗଠନ କରି ହଜାର ହଜାର ଲୋକଙ୍କଠାରୁ କୋଟି କୋଟି ଟଙ୍କା ଠକେଇ କରିଥିବା ଅଭିଯୋଗରେ ସମିତିର ସଦସ୍ୟମାନେ ଥାନାର ଦ୍ୱାରସ୍ଥ ହୋଇଛନ୍ତି | ଏଭଳି ଏକ ଅଭିଯୋଗକୁ ନେଇ କେନ୍ଦ୍ରାପଡ଼ା ଜିଲ୍ଲାର ରାଜକନିକା ଅଞ୍ଚଳରେ ଚର୍ଚ୍ଚା ଜୋର ଧରିଛି | ସୂଚନା ମୁତାବକ, ରାଜକନିକା ବ୍ଲକ ଅନ୍ତର୍ଗତ ଆୟତନ ବଜାରରେ ସୁଧାଂଶୁ ନାଥ ଓରଫ ଟୁଲୁ ନାଥ ‘ରାଉତ ବର୍ତ୍ତନୀ ତ୍ରିନାଥ ସମିତି କେନ୍ଦ୍ର’ ନାମରେ ଏକ ସମିତି ଚଳାଉଥିବା ଅଭିଯୋଗ ହୋଇଛି | ଏହି ସମିତି ମାଧ୍ୟମରେ ରାଜକନିକା ଅଞ୍ଚଳର ହଜାର ହଜାର ଲୋକଙ୍କୁ ପ୍ରଲୋଭିତ କରି କୋଟି କୋଟି ଟଙ୍କା ଠକେଇ କରାଯାଇଥିବା ସମିତିର ସଦସ୍ୟମାନେ ଅଭିଯୋଗ କରିଛନ୍ତି | ଏହି ଘଟଣାକୁ ନେଇ ସମିତିର ସଦସ୍ୟମାନେ ରାଜକନିକା ଥାନାରେ ପହଞ୍ଚି ସୁଧାଂଶୁ ନାଥଙ୍କ ନାମରେ ଲିଖିତ ଅଭିଯୋଗ ଦାଖଲ କରିଛନ୍ତି | ଅଭିଯୋଗ ଆଧାରରେ ପୋଲିସ ସୁଧାଂଶୁ ନାଥଙ୍କୁ ଅଟକ ରଖି ଘଟଣାର ତଦନ୍ତ କରୁଥିବା ସୂଚନା ମିଳିଛି | ଏହି ଘଟଣାରେ ପ୍ରକୃତରେ କେତେ ଟଙ୍କାର ଆର୍ଥିକ କାରବାର ହୋଇଛି, କେତେ ଜଣ ଲୋକ କ୍ଷତିଗ୍ରସ୍ତ ହୋଇଛନ୍ତି ଏବଂ ଅଭିଯୋଗର ସତ୍ୟତା କ’ଣ, ତାହା ପୋଲିସ ତଦନ୍ତ ପରେ ସ୍ପଷ୍ଟ ହେବ | ଏବେ ନ୍ୟାୟ ଅପେକ୍ଷାରେ କ୍ଷତିଗ୍ରସ୍ତ ସଦସ୍ୟମାନେ | ପୋଲିସ ତଦନ୍ତ ପରେ ଏହି ଘଟଣାରେ ଆହୁରି ଅନେକ ତଥ୍ୟ ସାମ୍ନାକୁ ଆସିବାର ସମ୍ଭାବନା ରହିଛି |