ଭୁବନେଶ୍ବର/ ଧାମନଗର: ଧାମନଗରରେ ବିଜେପି ଆଗ ପ୍ରାର୍ଥୀ ଦେଇ ନିଜର ଷ୍ଟାଣ୍ଡ କ୍ଲିଅର କରିସାରିଛି। ବିଜେଡି ଯେକୌଣସି ମୂହୂର୍ତ୍ତରେ ପ୍ରାର୍ଥୀ ଘୋଷଣା କରିବ। ମୈଦାନରେ କାହାକୁ ଓହ୍ଲାଇବ, ସେ ନିଷ୍ପତ୍ତି ମଙ୍ଗଳବାରକୁ ରଖିଛି କଂଗ୍ରେସ। ଏହାରି ଭିତରେ ବିଜେପି ଓ ବିଜେଡିର ମାରାଥନ ପ୍ରଚାର ଜୋରଦାର ହେଲାଣି ଧାମନଗରରେ। କଂଗ୍ରେସ ପଡ଼ିଆକୁ ଓହ୍ଲାଇନଥିବା ବେଳେ ଭିତିରିଆ ବୈଠକରେ ଉପଯୁକ୍ତ ପ୍ରାର୍ଥୀ ସନ୍ଧାନରେ ସମୟ ଲଗାଇଛି।
ଧାମନଗର ପାଇଁ ବିଜେପି ପ୍ରାର୍ଥୀ ସୂର୍ଯ୍ୟବଂଶୀ ସୁରଜ ନିଜର ପ୍ରଚାରକୁ ଜୋରଦାର କଲେଣି। ଆଜି ତାଙ୍କ ସହ ଯୋଡ଼ି ହୋଇଛନ୍ତି ପ୍ରଚାର ମୈଦାନରେ ରାଜ୍ୟ ବିଜେପି ସଭାପତି ସମୀର ମହାନ୍ତିଙ୍କ ସମେତ ଅନେକ ତୁଙ୍ଗ ନେତା। ଭଦ୍ରକାଳୀଙ୍କ ଦର୍ଶନରୁ ବିଜେପିର ପ୍ରଚାର ଆରମ୍ଭ ହୋଇଥିଲା। ବିଜେପି ଏଠାରେ ନିଜର ଆସନ କେବଳ ବଜାୟ ରଖିବନି। ବରଂ ଏଥର ଅଧିକ ବ୍ୟବଧାନରେ ଜିତିବ ବୋଲି ଦମ୍ଭୋକ୍ତି ଦେଖାଇଛି। ବାଲେଶ୍ୱର ଉପନିର୍ବାଚନରେ ବିଜେଡି ବିଜୟୀ ହୋଇ ବିଜେପି ହାତରୁ ଆସନ ଛଡାଇନେବାକୁ ଯେଉଁ ପନ୍ଥା ଆପଣାଇଥିଲା, ତାହାର ପୁନରାବୃତ୍ତି କରିବାକୁ ଏଠାରେ ଦିଆଯିବନି ବୋଲି ଚେତାଇ ଦେଇଛି ଦଳ।
ସେପଟେ ବିଜେଡି କାହାକୁ ପ୍ରାର୍ଥୀ କରିବ, ତାକୁ ନେଇ ଆରମ୍ଭରୁ ଅଙ୍କକଷା ଚାଲିଥିଲା ବେଳେ ଦଳର ଜନସମ୍ପର୍କ ପଦଯାତ୍ରାରେ କିଛି ଆଶାୟୀଙ୍କୁ ଆଗ ଧାଡ଼ଡିରେ ଦେଖିବାକୁ ମିଳିଥିଲା। ପୂର୍ବତନ ବିଧାୟକ ରାଜେନ୍ଦ୍ର ଦାସ ଯଦିଓ ବହୁ ଆଗରୁ ଟିକଟ ଆଶାୟୀ ଥିଲେ, ତେବେ ତାଙ୍କ ନାଁକୁ ନେଇ ସହମତି ସହଜେ ପ୍ରକାଶ ପାଉନଥିଲା। ଧାମନଗର ରାଧାବଲ୍ଲଭ ପଞ୍ଚାୟତରୁ ମନ୍ତ୍ରୀ, ସାଂସଦ, ବିଧାୟକ, ଜିଲ୍ଲା ପର୍ଯ୍ୟବେକ୍ଷକଙ୍କ ସହ ପଦଯାତ୍ରାରେ ସାମିଲ୍ ହୋଇଥିଲେ ରାଜେନ୍ଦ୍ର। ଆଉ କଂଗ୍ରେସ ଧାମନଗରରେ ଗ୍ରାଉଣ୍ଡକୁ ଏ ଯାଏ ଓହ୍ଲାଇନି। ପ୍ରାର୍ଥୀ ଚୟନ ନେଇ ଧୁଷୁରୀରେ ପ୍ରଥମ ବୈଠକ ପରେ ସୋମବାର କଂଗ୍ରେସ ଭବନରେ ଚୂଡ଼ାନ୍ତ ପ୍ରାର୍ଥୀ ଚୟନ ବୈଠକ ସରିଛି। ମୈଦାନକୁ କିଏ ଓହ୍ଲାଇବ, ମଙ୍ଗଳବାରକୁ ସ୍ପଷ୍ଟ କରିବ କଂଗ୍ରେସ।
ଧାମନଗର ଦୁଲୁକୁଛି। ପ୍ରଚାର ପ୍ରସାର ଓ ପ୍ରାର୍ଥୀ ଚୟନରେ ବିଜେପି ଆଗରେ ଥିଲା ବେଳେ ପ୍ରାର୍ଥୀ ଚୟନ ନେଇ ମୁଖ୍ୟମନ୍ତ୍ରୀଙ୍କ ନିଷ୍ପତ୍ତି ଆସିଲା ଯାଏ ଅପେକ୍ଷା ବି କରିନି ବିଜେଡି। ଆଉ କଂଗ୍ରେସ ବି ଗ୍ରାଉଣ୍ଡକୁ ଓହ୍ଲାଇବାକୁ ସଜବାଜ ହୋଇଗଲାଣି। କାରଣ ଆଉ ସମୟ ନାହିଁ ହାତରେ।
ନବକିଶୋର ସାହୁଙ୍କ ସହ ସତ୍ୟବ୍ରତ ପ୍ରଧାନଙ୍କ ରିପୋର୍ଟ
